دار بيبليون
أمثال هندوما/باقة من الأمثال اللبنانية جمعها لويس صليبا عن والدته هند الزيلع
لم يخلُ حديثٌ من أحاديث هندوما أي والدتي هند يوسف الزيلع (ت ك1 /2018) من مثَلٍ أو أكثر. إذ كانت، وباستمرار ترصّع كلماتها وأقوالها وبعفوّيةٍ بالأمثال. والتربية بالأمثال خيرٌ من التربية بالأقوال، يقول المثلُ العربي. فمنذ الصغر تفتّح فكري وذهني على الأمثال واستخدامها والتفكّر فيها. وكم من مرّة حاولتُ أن أحزّر هندوما عن مثلٍ ووجدتُ في معظمٍ الأحيان أنّها تعرفه! وكنتُ على مدى سنواتٍ أدوّنُ بعض ما يرد في أحاديثها من أمثال، وأقارنه بالصيَغ الواردة في موسوعات الأمثال اللبنانيّة لا سيما تلك التي وضعها أنيس فريحة([1])، والمونسنيور الفغالي وغيرهما. وأدقّق وأصحّح حتى تجمّع لديّ كمٌّ كبير من أمثال هندوما. وواصلتُ الجمع، بل كثّفته بعد وفاتها، وكنتُ أعتمد في ذلك على ذاكرتي، وما أستعيد فيها من مواقف لها وأقوال. وها إنّني أقدّم محصّلة هذا الجهد في هذا الفصل. وقد بوّبتُ الأمثال ألفبائياً بحسب أحرفها الأولى. وإسوةً بما فعلتُ في ب3/ف1، أي في الفصل المخصّص لتعابير هندوما ومصطلحاتها، باشرتُ بشرحِ هذه الأمثال، بيد أنّني وجدت وفي الغالب أنّي بصدد “توضيح الواضحات” وهو أصعب الأمور، كما سبق لي أن بيّنتُ. ([2]) فالمعنى في معظم هذه الأمثال يبدو جليّاً ولا يحتاج لأيّ تفسير أو تأويل. لذا أقلعتُ عن متابعة الشرح، واكتفيتُ بتفسير بعض ما غمُض أو التبس. وها إنّي أقدّم أمثال هندوما في هذا الفصل، وهي باقة من الأمثال اللبنانية الأصيلة، والتي لمّا تزل متداولة حتى يومنا هذا.
هند يوسف الزيلع
-إجتو شَحمة عَ فطيرة
أي جاءه ما أنقذه من ورطة أو مشكلة، وفي الوقت المناسب
-إجر لورا، وإجر لقدّام
أي متردّد وغير مقتنع أو غير متحمّس للقيام بعملٍ ما
-احترنا يا قرعة منين بدنا نبوسِك
أي حرنا كيف نرضيك، أو ماذا نفعل لترضى
-إحكي تَ إسمعك، إمشي تَ إقشعك
يقولها غالباً من كان معجباً بآخر ويستحسن كل ما يقوله ويفعله
-أحوالو فوق الريح
أي أنّه غنيّ جدّاً بل فاحش الثراء
-أخوت يحكي وعاقل يفهم
غالباً ما يحمل كلام المجنون عِبرة لمن يعتبر
-إذا ارتفع سعر الشعير بيهبط سعر الحمير
إنها معادلة اقتصادية بديهية كلّ آلة يرتفع مصروفها يهبط ثمنها
-إذا الكنافة بيدخلّا توم الموراني بحبّ الروم
إنها الحساسية القديمة بين طائفتَي الموارنة والروم الأرثوذكس
-إذا تسكّر باب بوجّك ألله بيفتحلك ميّة باب
لا تقنط وتيأس عند أوّل صعوبة أو عائقٍ بوجهك
-إذا جارك بخير إنتَ بخير
معادلة اجتماعية تقليدية تشير إلى التضامن الذي كان سائداً في العلاقات
-إذا حبيبك عسل لا تلحسو كِلّو
لا تبالغ في استغلال الأصدقاء والأحبّاء، فلكلّ شيء حدود
-إذا حلق جارك بلّ دقنك
الخير ينتقل من جارٍ إلى جار، وكذلك المصيبة
-إذا طُلِع عَ الشجرة بتعضّو كلبة الشمعة
تقال عن سيّئ الحظ، فمهما فعل يبقى الفشل نصيبه
-إذا كِنت بسَفر جيب لأهلك ولو حجر
ومثله: الإيد الفاضية مجوية. فمن محمود العادات أن لا يعود المسافر خالي الوفاض، وأن يحمل خصوصاً لأفراد أسرته الهدايا
-إذا لم يكن ما تريد فأرِدْ ما يكون
إنها الواقعية والرضى بالمقدّر
-إذا مستحي حطّ منخل
تقال للسخرية من الخجل الذي لا مبرّر له
-إذا وقع بالبحر بيطلع وبتمّو سمكة
الرجل المحظوظ أو المحنّك “كيف ما زتّيتو بيجي واقف”
-اذكر الديب وهيّي القضيب
وفي المثل الفرنسي “عندما تتحدّث عن الذئب ترى ذنبه” Quand on parle du loup on voit sa queu
-إسعى يا عبدي تَ إسعى معك
أي ساعد نفسك تساعدك السماء
-أُسقيك بالوعد يا كمّون
هي الوعود العرقوبية وغالباً ما لا تتحقّق
-اشتهى العضّة بالرغيف
وصل إلى حالة من الفقر يرثى لها
-اطعم التمّ بتستحي العين
أكرمه فيغضّ نظر
-اقعود أعوج واحكي جالس
حُسن المقال يغطّي عن سيّئ الأفعال
-اكتمل النِقل بالزعرور
اكتملت تعقيدات المشكلة أو المصيبة
-أكْل الرجال عَ قدّ فعالا
معادلة صحّية بسيطة وبديهية كلّما زاد مجهود المرء زادت كمّية طعامه
-أكل وشرب ونوم راح مبارح وإجا اليوم
تقال عمّن يعيش حياةً تخلو من هدفٍ سامٍ غير مادّي
-أكل ومرعى وقِلّة صنعة
تقال عن العاطل عن العمل أو التنبل الذ لا يهتمّ بالبحث عن عمل
-أكلة وانسمت عليك، كول وبحلق بعينَيك
أي طالما دعيت وقبلت الدعوة فلا مبرّر للخجل.
-الإجر بتدبّ مطرح ما القلب بيهبّ
لا يذهب المرء ويكرّر الذهاب إلا حيث له أحباب
-الأرض تطلّعلك والسما تنزلّك
دعاء لاستمطار البركة واستجلاب الرزق
-الأعور بين العميان ملك
معادلة بسيطة وبديهية، ومثلها “الكحل أحسن من العمى”
-الأقارب عقارب
ومثلها “ما بتجي المصايب إلا من القرايب”
-الأكل نصّو يقيت ونصّو يميت
هي الشراهة وعواقبها، وتقى المعادلة المنطقية والطبيعية: “الإنسان بياكل تيعيش، مش بيعيش تَ ياكل”، وقليلٌ من يعمل بها!
-الأمّ متل دودة القزّ تعبا لغيرا
عن تجرّد الأمّ وتضحياتها حدّث ولا حرج
-الأمانة قبل الديانة
ابحث في تعاملك وعلاقاتك عن استقامة المرء لا عن دينه
-الإنسان ما بياخد معو إلا أعمالو
ناموس كوني أقرّت به غالبية الديانات
-الإيد يلّي بتمسك ريشة خلقت إلا العيشة
مَثل يُجلّ حرفة الفنّ التشكيلي
-الباب يلّي بيجيك منو الريح سدّو واستريح
-البخل كشّاف العيوب وقاطع المحبّة من القلوب
-البخيل بيموت عليل
-البرد والقِلّة أصل كلّ علّة
قاعدة صحّية صحيحة فالبرد سبب لكثير من الأمراض
-البسين بياكلّو عشاه
أي رجل آدمي لا يتعدّى على أحد
-البغض بين القرايب والحسد بين الجيران
-البيت اللي بتاكل منّو لا تدعي عليه بالخراب
ومثله اللي بيشرب من البير وبيرمي فيه حجر
-التاج رغم الحلا مصدر بلا
…..كلّ ذي نعمةٍ محسود يقول الحديث الشريف
-التاجر بيكذب بالجملة، وبيصدُق بالمفرّق
-التاجر بيلحس القرش ولو كنّو عَ الصبّاط
-التجّار تلاتة: تاجر، وتويجر، وزبالة التجّار
-التجّار: نصّ كروش، ونصّ قروش
-التجارة غيّارة: يوم ربح ويوم خسارة
-الترويقة بتشيل الضيقة
-التعب علينا والطعمة عَ ألله واللي كاتبو ربّك يصير
-التعب وسَخ غسّلو بيروح
-التلم الأعوج من التور الكبير
-التوب اللي بتفصّلو نحنا منلبسو
-الجارة الثرثارة بلاها وبلا خبارا
الثرثرة مصدر للمتاعب…
-الجازة نصيب وتنصيب وقطع نصيب
-الجرس بيدعي الناس للكنيسة وبيبقى برّا
-الجمل لو بيشوف حردبّتو بيوقع وبِيفكّ رقبتو
-الجنازة حامية، والميّت كلب
-الجنّة بلا ناس ما بتنداس
-الحاجة اللي ما بتهمّك وصّي عليا جوز إمّك
-الحبل عَ الجرّار
-الحجر لولا وقع كان انوجع
-الحجر مطرحو قنطار
-الحرب بالنضّارات هيّن
-الحركة بركة
-الحقد متى زارك خرب ديارك
-الحكي المنعاد والطبخ المنزاد
-الحلاقة بالفاس ولا جميلة الناس
-الحملة عَ كتاف الأجاويد خفيفة
-الحيط الحيط يا ربّي توصّلني عَ البيت
-الحيط الواطي كلّ الناس بتركبو
-الخبر كبير أو زغير، إلو جوانح وبيطير
-الخطأ المشهور خير من الصواب المهجور
-الخلاف كلّه واقع عَ اللحاف
-الخوري بيغلط بالإنجيل
-الخوري مارون من أميون
-الخوف بيربّي أكتر من المحبّة
-الخوف بيهرّ الجوف
-الداخل بالسياسة متل الداخل بتنكة الكناسة
-الدارس غلب الفارس
-الدبّان بتعرف دقن اللبّان
-الدجاجة اللي بتقاقي ما بتبيض
-الدفا عفا ولو كان بعزّ الصيف
-الدمّ بيحنّ
-الدني بالضيق بتوَرجيك مين ببيعك ومين بيشتريك
-الدهر دولاب: يوم معك ويوم عليك
-الديك بيموت وعينو بالمزبلة
-الرجّال جلّاب والمرا دولاب
-الرجّال صندوق مسكّر
-الرخيص غالي والغالي رخيص
-الرزق السايب بيعلّم الناس الحرام
-الرشح أوّلو نام، وآخرو روح عَ الحمّام
-الرضا والتسليم مفاتيح النعيم
-الروم ما بيكسّر راسو القدّوم
-الزايد خيّ الناقص
-الزبون عصفور طيّار
-السِنة ورا الباب
-السياسة إجرين وكراسي
-الشاطر عمرو ما يموت
-الشاطر ما بيشغل بالو، والغشيم بيلاطش خيالو
-الشاعر إذا بيكون تاجر سمّيه بفرد مرّة فاجر.
والفاجر بياكل مال التاجر، يقول مثلٌ آخر
-الشَتوي بنيسان بتحيي السكّة والفدّان
-الشجاعة صبر ساعة
-الشيطان ما بيخرب موكرتو
-الصبر مفتاح الفرج
-الصبي لو بار تلتينو عَ الخال
-الصحة تاج على رؤوس الأصحّاء لا يراه إلا المرضى
-الصيف لو إلو إمّ كانت بتبكي عليه
-الضربة اللي ما بتقتلك بتقوّيك
-الضيعة اللي بتوصلها كول من بصلها
-الطبخ المنزاد والكلام المنعاد ما بينطاقو
-الطويل بياكل تين، والقصير بيموت حزين
-العافية بتجي من خروم الشبك، والمرض بيشلق شلق
-العبدة نزلت عَ السوق ما استحلت غير شفاتير ابنا
-العتب عَ قدّ المعرفة
-العروس قبل الإكليل ما بتعرف لمين بتصير
-العزب حشمتو قلّة أكلو
-العصا بتعلّم الدبّ يرقص
-العمر مش بعزقة
-العنزة الجربانة بتشرب من راس النبع
-العين ما بتعلى عن الحاجب
-الغرض مرض، وصاحبو أعمى
-الغريب أعمى، ولو كان بَصير
-الغضب أولو جنون، وآخرو ندامة
-الغلا بيشجّع، والرخص بيفزّع
-الغني البخيل متل الحمار الكبير: محمّلينو دهب وعَلَقو تبن وشعير
-ألف عدو برّا الدار، ولا عدوّ جوّا الدار
-الفاخوري متل ما بدّو بدير دينة الجرّة
-الفقير اللي ما عليه دين غني
-الفلّاح نزل عَ المدينة، ما استحلا إلا الدبس بطحينة
-القرباني ما بتعمل نصراني
-القيامة قايمة، وكنّتنا نايمة
-الكحل أحلى من العمى
-الكذب بيغدّي ما بيعشّي
-الكسل ما بيطعم عسل
-الكلام اللطيف بيطلّع الحيّة من وكرها
-الكلب اللي بدّك تجرّو عَ الصيد، بلا وبلا صيدو
-الكلب اللي بينبح ما بيعضّ
-الكلب خلّف جرو طلع ألعن من بيّو
-الله بيرزق كلّ عصفور، بس ما بيحطّلو رزقو بالعشّ
-الله لا يشغل حدا وحدو إلا كلّ تنين سوا
-الله معك يا جاري، إنتَ بدارك وأنا بداري
-الله يخلّي اللي بياكل من كيسو، وبيونّسني بحديثو
-الله ينجّينا من الحِكَما والحكومة
-الله ينجّينا من كلمة أنا
-اللي أكبر منّك بيوم، أخبر منّك بسنة
-اللي إلو رزقا بدّو ياكلا ولو من تمّ السبع
-اللي إلو عمر ما بتقتلو شدّة
-اللي إلو من الجمل إدنو، بيبرّكو للأرض
-اللي بالصندوق عَ الطيز ملزوق
أي يصرف أو بالحري تصرف كلّ مالها على لبسها
-اللي بتطعمو بيفوح واللي بتاكلو بيروح
-اللي بتطلّعن السمرا ما بيكفّو خطوط وحمرا
بمعنى المثل السابق: اللي بالصندوق…
-اللي بدّك تأخّرو لبكرا عملو اليوم
-اللي بدّك تحيّرو خيّروا
-اللي بدّك تخدمو طيعو، واللي بدّك ترهنو بيعو
-اللي بدّك تصاهرو لا تقاهرو
-اللي بدّو ياكل من خبز السلطان بدّو يضرب بسيفو
-اللي بدّو يسكَر ما بعِدّ قداح
-اللي بقلبو عَ لسانو
-اللي بكبّر حجرو ما بيصيب
-اللي بياخد من ملّة غير ملّتو بيوقع بعلّة غير علّتو
-اللي بياكل عَ ضرسو بينفع نفسو
-اللي بياكل عصي مش متل اللي بيعدّا
-اللي بيتّكل عَ الناس تتاجرلو خوازيق بتنجّرلو
-اللي بيخفي علّتو بتقتلو
-اللي بيسرق بيضا بيسرق جمل
-اللي بيشوف مصيبة غيرو بتهون عليه مصيبتو
-اللي بيفصّل من كيس غيرو بيوسّع
-اللي بيقوم بعد ما تشرق الشمس بتكبسو الشمس
-اللي بيوقع من إيدو الله يزيدو
-اللي تحت باطو مسلّة بتنعرو
-اللي سبق شمّ الحَبَق
-اللي سبقك فشخة سبقك كلّ الدرب
-اللي شرِب البحر ما بيغصّ بالساقية
-اللي ضرب ضرب، واللي هرب هرب
-اللي عَ بالو ما يحرم حالو
-اللي عاجبو هالكحل يتكحّل، واللي مش عاجبو يترحّل
-اللي عايز النار بيكمّشها بإيديه
-اللي عندو بهار بيرشّ عَ الخبّيزة
تقال عن الغني الذي يصرف ماله دون أن يسأل
-اللي فيك تدفع دِيّتو قتلو
-اللي ما بتتعب عليه الأيادي ما بتحزن عليه القلوب
-اللي ما بصيّف ما بشتّي
-اللي ما بيجي معك تعا معو
-اللي ما بيطال العريشة بيقول عن عناقيدا حصرم
-اللي ما بينبع بيفرغ
-اللي ما داق المغراية ما بيعرف شو الحكاية
-اللي ما عندو كبير يشتري (يستشير) كبير
-اللي متل هالبيك ادعسو بإجريك
-اللي ملوّع من الحليب بينفّخ عَ اللبن
-المال اللي ما بينبع بيفرغ
-المداومة بتقطع خرزة البير
-المستعجل ما بيسوق جمال
-المش عاجبو يدقّ راسو بالحيط
-المصارين بفرد بطن بتتخانق
-المصيبة بتجمع
-المكتوب عَ الجبين لازم تشوفو العين
-المكتوب ما منّو مهروب
-الملبوس ما بيعمل قسوس
-الناس أعداء ما جهلوا
-البنت عدوّا من غاب، وصديقا من حَضَر
-النومة عَ بكرا بتعمل شحم عَ الذكرى
-الوحدة عبادة
-الوردة بتخلّف قردة، والقردة بتخلّف وردة
-الوقيّة عَ البُعد قنطار
-الولادة رسول الموت
-الولد النقّاق كتّير الرضاعة
-الولد ولد ولو حكم بلد
-اليقين الضرير عليق الحمير
-إن حبّيت حبّ أمير، حتى إذا عيّروك يحرز التعيير
-إن دبِل الورد ريحتو منّو وفيه
-إن شاف الأعمى بيحسدو عَ عصايتو
-إن كان هالغزلة غزلتك حرير بدّك تلبسي
-إن لم يكن ما تريد فأرد ما يكون
-إنتِ اشتغلي تتطُعَمِينا ونحنا منهزّ لكاترينا
-انطر يا كديش تيطلع الحشيش
-انفخت الدفّ وتفرّقوا العشّاق
-انكمش عَ خوانيقو
-أوّل الدرب ولا نصّا
-أوّل دخولو شمعة طولو
-أوّلتو عسل، آخرتو بصل
-إيد اللي بتمسك قلم بتمحي ألم
-إيدك عنّي ومَعْليك منّي
-أيش بِفْتِكرك يا سفرجلة وكلّ عضّة بغصّة؟!
-أيش رماك عَ المرّ، قال الأمرّ منّو
-أيلول طرفو بالشتي مبلول
-باع جلد الدبّ قبل ما يتصيّدو
-باعو بقرد ودبّ
-بالبنط العريض
-بالرزق ولا بصحابو
-ببيتك في الصالون وفي الحمّام
-بتاكل ت أطعمك؟ بتشرب ت أسقيك؟
-بتبزّق عليه بيفتكر الدني عم تشتّي
-بتضلّا بصلتو محروقة
أي المستعجل دائماً
-بتعرف سرارن من زغارن
-بتموت القرقا وعينيا بالصيصان
-بحبِّك يا إسوارتي، قدّ زندي لأ
-بحصة بتسند خابية
-بدّك تجرّص زلمي جبلو مرا، وبدّك تجرّص مرا جبلا ولد
-بدّك تربح عداوتا مداح جارتا
-بدل ما تقلّا كِشّ كسِرلا إجرا
-بدّن يخلّو خراهن مغطّى
-بدّو العصفور وخيطو
-بدّو منّو وتفو عليه
-بدّو يطعميني بعقلي حلاوة
-بدّو يعزّي وما بيعرف مين مات
-بدّي شاور القاضي
يقولها من يستأذن للدخول إلى الحمّام
-براسو موّال بدّو يغنّيه
-برد كوانين بيخزّق المصارين
-بردان وبيفرّق لِحِف
-بيروح العاشق بيجي المشتاق
-بسّ تشيل إيدك من تمّو بيبطّل يعرفك
من لا يخدمك إلا بمقابل
-بسّ توقع البقرة بيكترو السلّاخين
-بسّ نوصل عليا منصلّي عليا
-بس يجي الأصيل بيروح الوكيل
-بيسوق كلّ الناس بفرد عصا
-بشعنينة المتاولة
-بضلّ إلبس خِفّ وإشلح خِفّ تـ يجي عَ إجري خِفّ
-بطرس أو حنّا حوِّل عَنّا
-بطن الإنسان عدوّو بالتمام
-بعد عيد الصليب كلّ أخضر بيسيب
-بعد ما فقّس من البيضا
-بعد ما كان سِيدا صار يطبّلا
-بعد ما هفّ ولا قعد عَ الرفّ
-بعد هالكبرة جبّة حمرة؟!
-بعمرك لا تقول للمغنّي غنّي ولا للراقوص رقوص
-بِقلّع بلاط الكنيسة
من كان واسع الذمّة ويسرق الكبيرة والصغيرة
-بقلّك هيك تـ تفتّح عينَيك
-بقول ل الأعور أعور بعينو
-بكانون كِنّ
أي استتر والزم بيتك اتّقاء من البرد
-بكرا بتبيّن القرعا من إمّ قرون
-بلا كاني وماني
-بلاها وبلا بلاها
-بلع لسانو
لزم الصمت
-بمشي الحيط الحيط، وبقول: يا ربّ توصّلني البيت
-بنت الحصيرة ما منريدا، وبنت السجّادة ما بتريدنا
-بوجّ الإنسان خُلاصة الأكوان
-بياخدك عَ النبع وبيرجّعك عطشان
-بياكل البيضا وتقشيرتا
-بياكل وبيهرّ وما فيه شي عَ ضرسو مرّ
-بيبكي دمّ عَ القرش
-بيت السبع ما بيخلى من العضام
-بيتدفّى عَ نارن
-بيتوقّاه متل العين الرمدانة
-بيجي الموت للخوري بيحدفو عَ الخوريّة
-بيجيك متل القضا المستعجل
-بيحبّ الأمارة ولو عَ الحجارة
-بيحبّ العلو ولو عَ الخازوق
-بيحرق حارة تيولّع سيكارة
-بيحسد الكلب عَ نومة الفيّ
-بيحكي قد قاضي معزول وخوري محروم
-بيحلب النملة
-بيدوب التلج وبيبان المرج
-بيسرق تنكة المحابيس
-بيسوق الكلّ بفرد عصا
-بيضة اليوم، ولا دجاجة بكرا
-بيضلّ ملفلف متل مطعوم النجاص
-بيضوّيلك صبيعو العشرة
-بيطلع عَ السما بتيابو
-بيطلع من الجوزة شي يطمّا
-بيظمط من خروم الإبر
-بيعرف القرّ والقراقير
-بيعطي باليمين وبياخد بالشمال
-بيعمل البحر طحينة
-بيعمل السبعة ودمّتا
-بيعمل من الحبّة قبّة
-بيقتل الدبّ بسيكونة
-بيقتل القتيل وبيمشي بجنازتو
-بيقول الصحيح ولو حرقت الكلمة تمّو
-بيقول اللي بِقلبو وما بيخاف إلا من ربّو
-بيقولو كيف حالك اليوم، مش كيف حالك مبارح
-بيمشي بالورب متل السلطعون
-بيمضى النهار، وما بيمضى شرّو
-بينزع الدبس عن الطحينة
-بِينكّت عَ الطير الطاير
-تاجر اللحمة بلا رحمة
-تأمّل ذاتك بتسعد بحياتك
-تتقتل عدّوك جوّا من ذاتك تقوّا
-تخانقو القعقان عَ كعك الجيران
-ترباية الولاد متل تقرقش الصوّان
-ترمس يا حلو ضِحك عَ ولاد الزغار
-تروّا عَ حوّا
-تروّق ولا تتعوّق
-تزوّج بجهلك، وربّي ولادك عَ مهلك
-تسكّع عَ بواب الملوك تتشحد مجد يا صعلوك
-تشبّص برأيو ومين بعد بيسمعو
-تطلّع القرد بالمراية، ومين بعد بيقنعو
-تعاشروا كالإخوان وتعاملوا كالأجانب
-تعب ساعة، ولا تعب كلّ ساعة
-تعبان بدقّ ريحانو
-تعلّم البيطرة بحمير النوَر
-تعلّم صنعة وحُطّا عالرف
-تغدّا وتمدّا، تعشّى وتمشّى
-تغيير الهوا أحسن من الدوا
-تفاءلوا بالخير تجدوه
-تفركش بخيالو
-تقاتلو القعقان عَ كشك الجيران
-تلاتة ما بينامو: الفزعان والجوعان والبردان
-تلطّى بخيال إصبعو
-تنين ما بيعرف قيمتن إلا اللي فقدن: الشباب والعافية
-توبة المريض مريضة
-تيصير عنّا طحين منفكّر بالعجين
-توب العيارة ما بيدفّي، وإذا دفّى ما بيدوم
-جابو الديب تيعلّموا القراية، قالولوا قول ألف قال عنزة، قول باء قال جدي
-جابولنا هالأعمى تيعبّي الإبرة
-جارك القريب ولا خيّك البعيد
-جايي مقهور متل العسكر المكسور
-جبل عَ جبل ما بيلتقو وابن آدم عَ ابن آدم بيلتقو
-جبنا الأقرع تيشجّعنا كشّف عَ القرعا وفزّعنا
-جحش كرّ لا بينفع ولا بيضرّ
-جحي ما فيه إلا عَ خالتو
-جحي وأهل بيتو عرس
-جرّة الحبل بتقطع خرزة البير
-جوابو تحت باطو
-جوقة كشكش
-جيرة القطّ والفار ما بتعمّر دار
-حافظ عَ قديمك، جديدك ما بدملك
-حاكمك وربّك ولمين بتشكي أمرك
حايص متل دجاجة بدّا تبيض
-حِبّ مالك، محِبّ ما لك
-حبل الكذب قصير
-حبيبي منيح وإجتو نسمة ريح
-حتى ترتاح ما تندم علّي راح
-حجّة ما بتقلي عجّة
-حدّ العقرب لا تقرب، حدّ الحيّة افرش ونام
-حدا بيشتري سمك بالبحر؟!
-حساب الحقل ما بيطابق حساب البيدر
-حطّ المكسورة عَ المجبورة وخلّي القصّة مستورة
-حطّ طيزك عَ وكر الدبابير، وقول يا ربّ التقادير!!
-حطّة إيدك
-حطّو دنبة البسين بالقالب أربعين سنة وطلعت عوجا
-حُطّو عَ الجرح بيطيب
-حطّيناه بالحضن، بلّش ينتف بالدقن
-حفر وتنزيل
-حقّ يضرّ ولا باطل يسرّ
-حكّلي تحكّلك، واسندني تحمّلك
-حكم التراضي خير من حكم القاضي
-حمار موالف ولا غزال مخالف
-حمار ومدّعي
-حِمل ونزل عن ضهري
-خالع النير، وقايم العرير
-خبز وزيتون أحسن ما يكون
-خبّي العسل بجرارو تتجي أسعارو
-خبّي قرشك الأسود ليومك الأبيض
-خدلك من هالحزمة عود والباقي تاكلو القرود
-خدي الأكبر منك بتَشِتْشِك، خدي المتل سنّك بينَتْوشِك
-خِفّة الراس بتتعِب السيقان
-خلَّص من خروم الشبك
-خِلقة كاملة نعمة زايدة
-خلقو براس مناخيرو
-خلّيا تبقى جوّا وتجرح، ولا تطلع لبرّا وتفضح
-خلّيك متل الشجر ما بينحني للظروف، وبيموت وقوف
-خلّيها تنقّي وتغنّي ولا تسلّق وتنوح
-خمّنا الباشا باشا، طلع الباشا زلمي
-خناقة عبيد بالليل
-خود الأصيلي ولو كانت عالحصيرة
-خود المتيسّر وطالب بالمتعسّر
-خود من الزرايب ولا تاخد من القرايب
-خود من إيد كانت ملانة وفرغت، ولا تاخد من إيد كانت فارغة وانتلت
-خود هديّتك، وكفيني بليّتك
-خير الأصحاب مين دلّك عَ الصواب
-خير البرّ عاجله
-خيّك الفقير فقّرك وما استغنى
-دِاري الجار ولو جار
-داير دينتو الطرشا
-دَبّ الهمّ بركابو
-دغري بيقطع الميّ من ضهر الشير
-دِقّ راسك بالحيط
-دقن الطمّيع بطيز المفلّس
-دنبتو بتفرط الجوزة
-دود الخلّ منّو وفيه
-ذاكرة السمكة، ذاكرة الفيل
-ذكرنا القطّ طلع عم ينطّ
-راح الصالح بعزا الطالح
-راحو الناس وما بقي إلا النسناس
-راكض ورا اللقمة وهيّي بتهرب منّو
-راهب دير مستقبل دايم آكل شارب نايم
-رايح فِيُن شرد مرد
-ربّحو جميلة من كيسو
-ربّنا ما ساوانا إلا بالموت
-ربوط الحمار مطرح ما بدّو صاحبه
-زِتّ عصاتك لفوق، وتتنزل حيا وفرج
-الرجال عند حاجاتها نسوان
-رجّعوا القديم عَ قدمو
-رزق ميّت صحابو
-رزق هالدني بيضلّ بهالدني
-رزقك متل خيالك وين ما تروح بيلحقك
-رنّ الفلوس بتحضر العروس
-رضينا بالبلى والبلى ما رضي فينا
-رضينا بالشحار والتعتير، قلنا الله كبير
-روح خيّط بغير هالمسلّة
-روّس الخيط
-زاجة مارونيّة عقدة شيطانيّة
-زاد الطين بلّة والمريض علّة
-زتّ عصاتك لفوق، ولنزولا حيا وفرج
-زرزور كفل عصفور وتنينن طيّارين
-زواج القرايب أكبر المصايب
-سابع يوم أكل وشرب ونوم
-ساعد نفسك تساعدك السماء
-سآل مجرّب ولا تسأل حكيم
-سألو البغل مين بيّك، قال الفرس خالي
-سألو جحي أيمتى بتقوم القيامة قلّن ساعة اللي بموت أنا
-سطر ورا سطر عمِلّن حساب بيصيرو كتاب
-سكّج عَ النجاص البرّي تيطلع الزعرور
-سكّر بابك ولا تتهُم صحابك
-سَكّو ركابو من الخوف
-سمك البوري وعصفور الدوري وابن الخوري ما بيعلقو
-شاف السفر أريَحْلو، فلّ ونسي أهلو
-شاف مصارينو دالقة قلّو عطيني شوي للبسين
-شاقق الأرض وطالع منا
-شال الزير من البير
-شال عينينا وحطّن بإيدينا
-شالح جِلدة طيزو وحاططها عَ وجّو
-شخّ عَ الحرام تصار حلال
-شرّ الصباح ولا خير المسا
-شرط الإلفة ترك الكلفة
-شعرة من هون وشعرة من هون بيعملو دقن
-شُغل الليل مسخرة النهار
-شقلت الغنمة ليّتا، ضحكت عليا العنزة
-شكرنا بالبسين، خري بالطحينات
-شمّع الخيط وراح
-شو الفرس قلعت التوتة؟!
-شو بدّو الأعمى؟ قال عين وحدة
-شو بيصبّرك عَ المرّ؟ الأمرّ منّو
-شو حاطط من الرسمال تيسأل عن الخسارة؟!
-شو خصّ طزّ بمرحبا
-شو قالت العنزة السارحة؟ الليلة مش متل مبارحة
-شو ما عطاك عمّك خود مِنّو
-شو ما فيه حلاوة إلا ببعلبك؟!
-شو همِّك يا جونية من هدير البحر
-شوكة وانقلعت
-صاحبك إن بدّك تبقّيه لا تاخد منّو ولا تعطيه
-صار للخرا مرا وصار يحلف بالطلاق
-صبيع إيدَيك مش متل بعضا
-صُوم وصلّي بتركبك القلّة
-ضاعت ولقيناها
-ضرب الحبيب زبيب
-ضربة عَ الحافر، ضربة عَ المسمار
-ضربلك حجر بهالجوزة
-ضرُبو وصيبو وقول هيدا نصيبو
-ضوّي قنديلك قبل ما تصير الدني ليل
-طابخ السمّ آكله
-طربوش بيّو معلّق بالتوتة
-طعماه إبري، خرّاه مسلّي
-طلبناها من السما لقيناها عَ الأرض
-طلع صيتك حاصود زتّ منجلك وقعود
-طلعت دقن إبنك حلُق دقنك
-طلعت سلّتها بلا تين
-طول النهار بتخفُق (بتِحْرُك) والعشا خبّيزة
-طول عمرك يا زبيبة من طرفك هالعودة
-طول ما نحنا عَ هالحصيرة لنّا طويلة ولنّا قصيرة
-عَ الجهل كبرت، وعَ الخرف بعد بكّير
-عَ حجّة الوردة بتشرب العلّيقة
-عَ حظّ الحزينة سكّرت المدينة
-عَ عشرة الكبير بتكبر، وعَ عشرة الزغير بتزغر
-عَ قدّ بساطك مدّ إجريك
-عارف البير وغطاه
-عاشر القوم أربعين يوم، يا بتصير منن يا بترحل عنن
-عامل بوتيكة
-عايف التكَنَة
-عدس بترابو كلّ شي بحسابو
-عرج الجمل من شفّتو
-عزرايل ما بيخرب وكرو
-عشيقك لا تاخديه، ومطلّقك لا تردّيه
-عصافير بطنو عم تزقزق
-عقّال بلا جهّال ضاعت حقوقن
-عقلك براسك بتعرف خلاصك
-عقلك براسك تنين بديروك
-علّمناه عَ الشحادة سبقنا عَ البواب
-عم إحكي يا جارة تتسمعي يا كِنّة
-عمرك سمعت إن الديب بيرحم نعجة؟!
-عند الجلي قوم يا أنطون، وعند الغنايم خلّو أنطون نايم
-عند تغيير الدول إحفظ راسك
-عند فصلو رجع لأصلو
-عندو الأعور أعور بعين
-عيش كتير بتشوف كتير
-عيون زرق، سنان فرق، عقلات ترق
-غاب القطّ العاب يا فار
-غالي والطلب رخيص
-غلطة الشاطر بألف غلطة
-غنّج حيّة، ولا تغنّج بنيّة
-فالت الحبل عَ الغارب
-فتّش بدارك قبل ما تتهُم جارك
-فخّار يكسّر بعضو
-فرَط الدفّ وتفرّقوا العشّاق
-فروتو بتجرّ عَ الأرض
-فلّاح مكفي سلطان مخفي
-فلان دخل علينا كأنو قابر إمّو
-فلق البعرة
-فوق الدكّة شرطوطة
-فوق حقّو دِقّو
-فَوقو خرا وتحتو خرا وبيسأل من وين الريحة
-في ناس بيفهموا بالإشارة، وفي ناس الحكي معهن خسارة
-قاضي الولاد شنق حالو
-قاعد بالحضن وبينتف بالدقن
-قال الحيط للوتد: ليش عم تشقّني؟ قلّو اسأل اللي عم يدقّني
-قال الكردي نطح الحيط، قلّو هيدا الكردي وهيدا الحيط
-قال أي متى بصير عنا دولة قالو القيامة بعدا مطوّلة
-قال لا تبيع رخيص، قلّو لا توصّي حريص
-قال: كيف حال ولادك، قلّو هو هن قدّامك
-قالو كديش الناعورة غبي رشّولو ميّ، قالو تطيلع ميّ منرش عليه
-قالو لأرامل نيحا ليش ما بتتجوّزو، قالو: إجا حدا وردّيناه؟
-قالو للبسين كيف تعلّمت الصيد والنطرة؟ قال مش علم بالفطرة
-قالو للبسينة بتعمليلنا زيارة، قالت عَ شرط يكون عندكن فارة
-قالو للحرامي حلُف يمين، قال إجا الفرج
-قالو للحما: ما كنتِ كنّة؟ قالت: كنت ونسيت
-قالوا للبسينات خراكن بينفع صارو يشُخّوا ويطمّوا
-قالوا للديك صيح، قلّن كلّ شي بوقتو مليح
-قالوا للكلاب اركضو وعوّوا، قالوا كارَين بفرد مرّة ما بيصير
-قدّ الكنيسة ما حدا شربان شموع، وقدّ خدّي ما حدا شربان دموع
-قدّ ما تتعب وتكوش، غير رزقك ما بتحوش
-قد ما قِلَّك، الحكي مش متل الشوفة
-قِرْد يسلّيك ولا غزال يتمقطَع فيك
-قِرطة حنيكر
-قلبي عَ ولدي وقلب ولدي عَ الحجر
-قلّع شوكك بإيدك
-قلّل طعامك تحمد منامك
-قلّو تفي عَ الدني، قلّو تفي عليك ما بتعرف تعيشا
-قلّو حبّني وخدلك جحش، قلّو المحبّة ما بتكون دحش
-قلّو حسد والا ضيقة عين؟ قلّو من التنين
-قلّو دعيلي بالتوفيق، قلّو الله يبعتلك صديق
وفي الأمثال العربية ابحث عن الرفيق قبل الطريق
-قلّو شو أطيب من العسل، قلو الخلّ ببلاش
-قلّو شو خلّاك تتغيّر، قلّو تصرّفاتك يا زغيّر
-قلّو ليش عم تبكي وأنا عمّك، قلّو عم إبكي لأنّك عمّي
-قلّو مين أخبر فيك، قلّو جارك ومربّيك
-كاسر إيدو وعم يشحد عليا
-كان ناقص هالقِدري بتنجانة تتصير مليانة
-كانت ستّي صبيّة وكانوا يحوموا حولها الشباب
-كانوا يدوّروا عَ الجدود صارو يدوّروا عَ الخدود
-كِبْرت دقن ابنك حلوق دقنك
-كتّر الأسئلة، وخفّف الدوران
-كترة الشدّ بترخي
-كرمال عين تكرم مرج عيون
-كرمالو بيروح بالعرض متل بابوج الخوريّة
-كري السلّم حملانو
-كسَرها وجبرها
-كفّك عَ المعنّى
-كِلّ الجمال بتعارك إلا جملنا بارك
-كلّ الدروب بتودّي عَ الطاحون
-كلّ الندّابات كذّابات إلا الميمات والخيّات
-كلّ جيل مع جيلو يلعب
-كلّ حادث وإلو حديث
-كِلّ ديك عَ مزبلتو صيّاح
-كلّ زمان وإلو دولة ورجال
-كلّ شي إذا ربّيتو بينفعك، إلا ابن آدم بيقلعك
-كلّ شي بدّو عناية، حتى المي بالقناية
-كل شي بوقتو مليح، مسبّة الدين بوقتا تسابيح
-كلّ شي ضِحِكْلو سِنّي، إلا شريكي بفنّي
-كلّ شي عادة، حتى العبادة
-كلّ شي بيكبر إلا الحزن بيزغر
-كلّ طويل هبيل، وكلّ قصير بالأرض فتنة
-كلّ عيلة وفيها كفايتا
-كلّ فرس وإلها خيّالا
-كلّ ما زادت شيبتو بتقلّ هيبتو
-كلّ ما كِبر، كلّ ما صغرو عقلاتو
-كل مالو لورا متل بَعر الجمال
-كلّ مين بدينو الله يعينو
-كلّ مين بسَيْسر أمورو حسب مَقْدورو
-كلّ مين عَ شكلو شَكْشِكلو
-كلّ مين يزرع حقلو بعقلو
-كلّ واحد بينام عَ الجنب اللي بريّحو
-كلّ واحد يقلّع شوكو بإيدو
-كم جدي بالمسرح بيسبق إمّو للمسلخ
-كول خبز وزيت وناطح الحيط
-كول من الفِجل الورق، ومن اللحم المرَق، وخود من النسوان الشلق
-ل آخر ما عمّر ربّنا
-لا بالعير ولا بالنفير
-لا بيهشّ ولا بينشّ
-لا تدين حدا بدِينو، كلّ مين عَ دينو الله بعينو
-لا تعيّر مزاريبك باليوم الماطر
-لا تقرّب عَ القبور، ولا تشمّ ريحة بشعة
-لا تنصح جاهل بتعاديه
-لا تهزّو واقف عَ شوار
-لا للسيف، ولا للضيف، ولا لغدرات الزمان
-لا نحلتك ولا تعقصني
-لا يغرّك رخصو، بترمي نصّو
-لاقيني ولا تطعميني
-لبّس الأسمر أحمر وضحاك عليه
-لبّس العود بيجود
-لبِقْتَلك ولبقتلي، والدهر وفَّق بيناتنا
-لسانو بيقصّ متل المنشار
-لمّا بتوقع البقرة بيكترو السلّاخين
لمّا بيجوع الحمار بياكل جلالو
-لمّا بيفلّس التاجر بيرجع لدفاترو العتيقة
-لمن بتسلّم عليه عدّ صابيعك
-لمّن منوصل ليا منصلّي عليا
-لو بدّا تشتّي كانت غيّمت
-لو بدّي من هالإبر المخرّمة كان عندي قفف معرّمة
-لو تمّ ياكل، ما لو تمّ يحكي
-لو فيها خير ما رماها الطير
-لو ما توافقو ما ترافقو
-لولا المربّي ما عرفت ربّي
اللي إلو مدّة ما بتقتلو شدّة
-لِين من غير ضعف، وشدّة من غير عنف
-ما إجا من الشام إلا قسا وآلام
-ما أطولك يا يوم الشقا، وما أقصرك يا يوم اللقا
-ما البعد جفا، والوعد دورة عَ الوفا
-ما إلك صاحب إلا بعد قتلة
-ما إلك عدوّ متل عدوّ الكار
-ما إلك محبّ تَ إلك ألف عدوّ
-ما بتتذكّرونا يا خالي إلا وقت العتالة
-ما بتجي الطوبِة إلا بالمعطوبة
-ما بتجي المصايب إلا من الحبايب
-ما بتركب عَ قوس قزح
-ما بتعرفو خيري ت تعاشرو غيري
-ما بتتغيّر بالدني حبّة إلا بأمر ربّي
-ما بتهزّ العروش غير النسوان والقروش
-ما بحطّ إيدي تحت هالبلاطة
-ما بيحكّ جلدك متل ضفرك
-ما بخاف لا من كبير ولا من زغير، بخاف من عذاب الضمير
-ما بيشِكّ الشيش بخشيش
-ما بيشوف أبعد من مناخيرو
-ما بيطيق الزاحلة
-ما بعدا زغيّورة وفرفورة وعندا الدني مشوار وتنّورة
-ما بفلّ عن ورقا علّمتها شعري والسما زرقا (6/19)
ما بيفوتَك شي من اللياقة
-ما بيقول هي إمّي تشقّ عليا شوي، وهيدا بيّي تَ رشّ عَ وجّو نقطة ميّ
-ما بقى من العمر أكتر ما مضى
-ما بِقي بالميدان إلا حديدان
-ما بياخد الغنايم إلا صاحب العزايم
-ما بيأخِّر مستعجل
-ما بيبرَك العجين لو ما بيروح من الطحين
-ما بيتكحّلو الجفنَين لولا وجود العين
-ما بيجي الدِقر إلا بالعقر
-ما بيجي من الغرب شي بسرّ القلب
-ما بيحرتق بالطنجرة غير العضام
-ما بيحمل همّك إلا اللي من دمّك
-ما بيحنّ عالعود غير قشرو
-ما بيخلّي حدا من شرّو
-ما بيرخص بالشتي إلا المي
-ما بيروح يوم وبيجي متلو
-ما بيصحّ إلا الصحيح
-ما بيضحك للرغيف السخن
-ما بيضلّ من الحياة إلا شويّة ذكريات
-ما بيضلّ من الناس إلا كمشة حكي
-ما بيطيق الزاحلة
-ما بيمون عَ حالو، بدّك يمون عَ عيالو؟!
-ما بيئذي نملة
-ما ترك عَ خميرتو طحين
-ما تسنّ عَ ذوقك قوانين متل رجال الدين
-ما تعرج قدّام مكرسح
-ما تندهي ما في حدا
-ما حدا ببخّر لربّو ببلاش
-ما حدا بيموت إلا تتجي ساعتو
-ما حدا بينادي عَ زيتاتو عكرين
-ما حدا عِقل وندم
-ما حدا فوق راسو خيمة
-ما خلّى سِتر مغطّى
-ما دام المسلم صايم لحِّق يا بطني عزايم
-ما راح جحي وارتحنا منّو حتى رجع يقول صبّحك بالخير يا خالتي
-ما زال البِزرة بِزرة ديب شو بدّو يطلع من اللبن والحليب
-ما صار شي تَ صار متلو
-ما عصي ابن آدم إلا الموت
-ما عندن شي يتعشّو، جابو فجل تَ يتدشّو
-ما في شحّاد بيحبّ صاحب مخلاية
-ما في شي بيجي عَ الهِينة
-ما كان لا عَ البال ولا عَ الخاطر
-ما كلّ من صَفّ صواني صار حلَواني
-ما متّ، ما شفت مين مات
-ما معوّقك عن طلوع الجرد إلا الحفا
-ما منعرف البيك من السكيك
-مات كلب المير كلّ الناسّ عزّت فيه، مات المير ما حدا عزّا فيه
-مال الدني بيضلّ بهالدني
-مال الموارنة للخوارنة، ومال الروم للبطون، مال الإسلام للنسوان
-متل أرامل جبل نيحا
-متل اسحاق ويعقوب بيضلّو مع بعضن
-متل الإبرة بتكسي الناس وهي عريانة
-متل البسين اللي عم يلسح المبرد
-متل البقرة اللي بتحلب، وبعدين بتترقن لبطة
-متل الجِبّانة ما بتردّ ميّت
-متل الحجر بين شاقوفَين
-متل الحِمّام المقطوعة ميّتو
-متل السمك بالبحر: الكبير بياكل الزغير
-متل الشيخ المقِلّ
-متل الضراط عَ البلاط
-متل العاوز مشوار عَ دوما
-متل القرعة اللي بتتكنّى بشعر جارتا
-متل اللحمة عَ الضفر
-متل اللي بيشرب من البير وبيكبّ فيه حجر
-متل اللي بيكون عم يحلق بصير يقبّع ضراس
-متل اللي جاب الدبّ عَ كرمو
-متل اللي حامل روحو عَ كفّو
-متل اللي راح يصلّي بالجامع لقاه مسكّر قال خيرية يا نبي اللي طلعت منّك مش منّي
-متل اللي معلّق بحبال الهوا
-متل اللي موكّل البسين بالجبنة
-متل الليرة
-متل المشايخ إذا تعطّلو بيصيرو يمشيخو بعضن
-متل الوتد بالرجمة: هزّو بينهزّ، تعا شلطو ما بينشلط
-متل براغيت القنطرة عري وزنطرة
-متل بنات اللعازارية كلّ وحدة شكل
-متل تنابل السلطان
-متل خيل الدولة: أكل ومرعى وقلّة صنعة
-متل عزيمة الحمار عَ العرس
-متل عفش بشارة واكيم
-متل غيم شباط كلّ ساعة براي
-متل كبكاب الشوك، كيف ما دقّيت فيه بتشكّك شوكة
-متل مار روكز وكلبو
-متل مطران بمكّة
-متل مكّوك الحياكة بيضلّ طالع نازل
-متل نيّاك الهوا، كلّ ساعة براي
-متى ما ركبت تبقى هزّ إجريك
-محبّتك متل عشب السطوح ما بتلحق تطلع حتى تروح
-مزّيكا يا مزّيكا ملّا بضاعة أنتيكا
-مش عاجبك قصّ حواجبك
-مش عاجبك قطاع عنّي الطحنة
-مش كلّ مرّة بتسلم الجرّة
-مَشْيِتنا عَ الأرض خطيّة
-مُصّْ القصب عقدة وعقدة
-مطرح ما بترزق إلزق
-مطرح ما غِدي طلعلو الضو
-معبّقة معي
-معك قرش بتسوى قرش
-مفتاح التمّ لقمة، ومفتاح الشرّ كلمة
-مفكّر كأنو الله خلقو وكسر القالب
-مقتل الرجل بين فكّيه
-مقصّر وفُصّو حامي
-مكتوب عَ ورق الخيار: اللي بيسهر الليل بينام النهار
-من الدلفة لتحت المزراب
من سيّئ إلى أسوأ
-من الموجود جود
-من المولود للمعمود بتوقف المي عامود
-من برّا رخام، ومن جوّا سخام
-من جرّب المجرّب كان عقلو مخرّب
-من حُضِر السوق باع واشترى
-من خِلق علق
-من طلب الزيادة وقع بالنقصان
-من طلب الشيء قبل أوانه عوقب بحرمانه
-من قِلّة الخيل شدّوا عَ الكلاب سروج
-من قِلّة الرجال سَمّو الديك بو قاسم
-من هالك لمالك لقبّاض الرواح
-من هلّق لوقتا بموت ناس وبعيش ناس
-من هون مصرية، ومن هون مصرية بيصيرو ميّة
-منضرب هالحجر بهالجوزة، إن وقع جوز أكلنا
-منغطّي السماوات بالقبوات
-منيح اللي طلعت منّك مش منّي
-موراني وخيّر، شي بحيّر
-مين أدرى بخبارك غير ربّك وجارك؟!
-مين أكل خبز بالدين ارحموه، ومين أكل لحم بالدين إرجموه
-نار الأحبّا عسل ومربّى
ومثلها: ضرب الحبيب زبيب
-نار جهنّم حبر على ورق، وإذا انوجدت للمشاوي والعرق
-ناس بتاكل دجاج وناس بتوقع بالسياج
-ناس من لحمك ودمّك باعوك لا تلوم اللي مبارح عرفوك
-نام بكّير وقوم بكّير وشوف الصحّة كيف بتصير
-نفسو دنيّة
-نيّال اللي بيغيب وبوكّلك بولادو
-نيّة الجمل شي ونيّة الجمّال شي
-نيّمي أهلك، وانزلي على مهلك
-هات إيدك والحقني
-هالدني سرساب وطرطقة مزراب
-هبّة سخنة وهبّة باردة
-هربنا من الدبّ وقعنا بالجبّ
-هيدي حال الدني: ناس بتحبّك وناس بتسبّك
-واقف عَ باب جهنّم يبيع تلج
-وانخلي يا ليلى
-وشوشة المخدّة ما عليها مردّة
-وصل الموس عَ دقنو
-وعد بلا وفا عداوة بلا سبب
-وقَعِتْ والا رماك الجَمَل، قلّو وقعت عَ كلّ حال
-ولو نصح الكلب لحمو ما بيتّاكل
-يا ابن آدم حاج تكوش، غير رزقك ما بتحوش
-يا أرض اشتدّي ما حدا قدّي
-يا بادل غزلانك بقرود
-يا رايح كتّر القبايح
-يا ريتنا حبّينا حيّة ولا حبّينا هالبنيّة
-يا زلِع سلّم عَ البلِع
-يا سراجَين وشمعة، يا عالعتم جمعة
-يا شاري العبد بمالك، اشتري الحرّ بأعمالك
-يا شي يصلح يا بلاه أصلح
-يا ضنى حالي، صفّيت لحالي
-يا كلمة اللي قلناها، ويا وقعة اللي وقعناها
-يا ما فيه بالقبور حبايب
-يا مستعجل وقّف تَ قلّك أنا مستعجل أكتر منّك
-يا مهنّي قبل بوقت، ويا معزّي بعد حين!
-يسواك ما يسوى غيرك
-يللي متلنا تعو لعنّا
-يلّي ما بتأثر فيه الكلمة ما بتأثر فيه العصا
-يوم أحزاني، ما حدا عزّاني
-يوم التلاتي وراتي، ويوم الخميس فصّل وقيس
-يوم عرسو وجعو ضرسو
[1] -Freyha, Anis, A Dictionary of Modern Lebanese proverbs Collated, annotated and translated into English, Beirut, Librairie du Liban , 1974,
[2] -صليبا، د. لويس، المسيحية والإسلام بين الأمس واليوم: بحثٌ في تطوّر العلاقات بينهما من يوحنا الدمشقي إلى وثيقة الأخوّة، جبيل/لبنان، دار ومكتبة بيبليون، ط1، 2022، ص160.